Gündəm - Azeri News https://azerinews.az/ Gündəm - Azeri News true https://azerinews.az/gundem/13675-rusiyada-ayda-qayq-ab-ln-v-yaralananlar-var.html rus Gündəm / Cəmiyyət Fri, 05 Jun 2026 18:13:47 +0400

Rusiyada çayda qayıq aşıb, ölən və yaralananlar var

Rusiya Federasiyasının Xantı-Mansi Muxtar Dairəsində içərisində səkkiz sərnişinin olduğu qayıq Ob çayında aşıb.

Bu barədə İstintaq Komitəsinin Nəqliyyat üzrə Mərkəzi Regionlararası İstintaq İdarəsinin mətbuat xidmətindən bildirilib.

"İlkin məlumatlara görə, iyunun 5-i səhər saatlarında Oktyabrsk rayonunda Ob çayında 8 sərnişini olan kiçik gəmi aşıb. Hazırda həlak olanların və xəsarət alanların sayı müəyyənləşdirilir", – məlumatda qeyd olunub.

Su nəqliyyatı vasitələrinin hərəkəti və istismarı zamanı təhlükəsizlik qaydalarının pozulması ilə bağlı cinayət işi başlanıb, müstəntiqlər hadisənin təfərrüatlarını araşdırırlar.

]]> true https://azerinews.az/gundem/13674-ermnistan-kritik-seim-qarsnda-slh-yoxsa-uurum-rh.html rus Gündəm / Siyasət Fri, 05 Jun 2026 17:29:40 +0400

Ermənistan kritik seçim qarşısında: sülh, yoxsa uçurum? – ŞƏRH

2026-cı ilin 7 iyun tarixində keçiriləcək parlament seçkiləri təkcə Ermənistanın daxili və xarici siyasi kursu deyil, həm də bütövlükdə regionun gələcək geosiyasi mənzərəsi və təhlükəsizlik arxitekturası baxımından vacib əhəmiyyət kəsb edir. Hakim "Vətəndaş müqaviləsi" partiyası seçkilərə Azərbaycanla sülh müqaviləsini imzalamaq, sərhədlərin delimitasiyasını tamamlamaq, dinc qonşuluğa nail olmaq, iqtisadi inteqrasiyanı təmin etmək kimi vədlərlə qoşulub.

Müxalifət, yəni rusiyayönlü revanşist qüvvələr isə Paşinyanı milli maraqları satmaqda ittiham edərək, Azərbaycanla sülh prosesinə, Ermənistanın qərbyönümlü siyasətinə qarşı çıxır, ölkəni Rusiyanın təsir dairəsində saxlamaq niyyətini açıq bəyan edir.

Buna görə də seçki nəticələrinin iki ssenari üzərində qurulacağını ehtimal etmək olar. Birinci halda sülh prosesi davam edir, Ermənistan konstitusiya dəyişikliyinə gedir, Azərbaycanla sülh müqaviləsini imzalayır, Cənubi Qafqaz regionunda sabitlik möhkəmlənir. İkinci halda isə region yenidən gərginlik ocağına çevrilir, sülh və sərhədlərin delimitasiya prosesi dayandırılır, regionun iqtisadi inteqrasiyası arxa plana keçir.

"Hansı tərəfə?" yox, "hansı gələcəyə?" səs vermək lazımdır

İstənilən cəmiyyət seçim edərkən ilk növbədə özünün gələcək rifahını və təhlükəsizliyini əsas tutmalıdır. İndiki halda isə Ermənistanın gələcək rifahı və təhlükəsizliyi Azərbaycanın formalaşdırdığı yeni regional nizama uyğun gəlib-gəlməyəcəyindən asılıdır.

Torpaqlarını Ermənistanın işğalından azad etmiş Azərbaycan faktiki olaraq İrəvanın özünü bu işğalçılıq siyasətinin girovluğundan qurtarıb. Paşinyan hökuməti bunu anlayır və ölkənin gələcəyinin Azərbaycan Prezidenti İlham Əliyevin müəllifi olduğu sülh gündəliyinin irəliləməsindən asılı olduğunu açıq etiraf edir.

Bundan sonra da İrəvanda hakimiyyətə gələn istənilən qüvvə anlamalıdır ki, yeni reallıqlarda Azərbaycanın milli maraqları, təhlükəsizlik şərtləri və regionun gələcəyinə dair baxışı nəzərə alınmadan Ermənistanın özünün maraqlarını və gələcək inkişafını təmin etmək mümkün olmayacaq.

Əslində seçkiqabağı təşviqat prosesi göstərir ki, mübarizəyə qatılmış bütün tərəflər bu reallığı etiraf etməsə də, dərk edir. Ermənistanda keçirilən debatlarda və aksiyalarda Ermənistan adından çox, Azərbaycanın və Prezident İlham Əliyevin adının çəkilməsi göstərir ki, erməni cəmiyyəti daxilən bir neçə cəbhəyə parçalansa da, dərk edir ki, İrəvanın gələcək taleyi Bakı ilə münasibətləri necə davam etdirəcəyindən birbaşa asılıdır.

Bununla belə, Ermənistanda son dövrlər keçirilən rəy sorğularından da anlamaq olur ki, revanşist əhvali-ruhiyyə heç də erməni cəmiyyətini tam tərk etməyib. Bu, həm əsrlərlə erməni xalqına təlqin edilən "Böyük Ermənistan", "ali irq", "türk düşmənçiliyi" ideyalarının beyinlərə hakim kəsilməsindən, həm də "məğlub tərəf" sindromundan irəli gəlir. Revanşist qüvvələri narahat edən də məhz bu xəstə təfəkkürün reallıq hissinə məğlub olmasıdır.

Hər bir halda, Ermənistandakı daxili siyasi mübarizədə hələ də Qarabağ kartından istifadə olunursa, deməli bu faktor regional sülhün gələcəyinə təhdiddir. Bu təhdidin tam və birdəfəlik aradan qaldırılması isə yalnız Azərbaycanın da tələb etdiyi kimi, Ermənistan Konstitusiyasına dəyişiklik etməklə mümkündür.

Bu gün Ermənistanda hakimiyyət uğrunda mübarizə aparan hər iki düşərgə öz mesajlarını aydın səsləndirir: Paşinyan tərəf "sülh" dediyi halda, müxalifət revanşist ideyaları körükləyir və ənənəvi "Qarabağ kartı" üzərindən manipulyasiya edir.

Hər iki halda geosiyasi qütblərin maraqları da özünü göstərməkdədir. Bölgədə özünün geosiyasi və iqtisadi maraqlarını təmin etmək istəyən ABŞ Paşinyanın "sülh düşərgəsi"nin, Ermənistan kimi forpostu itirmək istəməyən Rusiya isə revanşist qüvvələrin yanında yer alıb.

Avropayönümlü Paşinyan və Rusiyayönümlü Avropa

Paradoksal olan isə Avropanın mövqeyidir. Bir yandan Avropa qurumları qərbyönümlü Paşinyan hökumətini dəstəkləyir, Qarabağ və sülh mövzusunda isə Rusiyapərəst revanşist müxalifətin mövqeyini bölüşür.

Məsələn, bir yandan Rusiya Yessentuki şəhərində Qarabağda erməni separatçılığının rəmzi sayılan Tatik-Papik abidəsinin yeni nüsxəsini quraşdırır, digər yandan Avropa Parlamentində Azərbaycana qarşı qərəzli qətnamələrin qəbul edilir, İsveçrədə deputatları özünü deputat adlandıran Qarabağ separatçıları ilə görüşlər keçirir və s.

Bu tip davranışlar əslində bu dövlətlərin özlərinin nüfuzuna birbaşa zərbə deməkdir. Çünki həm Avropa, həm də Rusiya Azərbaycanın ərazi bütövlüyünü tanıyıb, Qarabağ və Şərqi Zəngəzurun işğalı illərində oradakı oyuncaq "erməni dövləti"ni heç vaxt tanımayıb. Öz imzaladıqları sənədləri marjinal maraqlara qurban verən bu güclər əslində beynəlxalq hüququn təməl prinsiplərini aşındırırlar.

Görünür, başqa dövlətlərin liderləri Avropa İttifaqının xoşuna gəlməyə çalışdığı bir vaxtda İlham Əliyevin Azərbaycanın milli maraqlarını prinsipial şəkildə müdafiə etməsi bu güclərin ikiüzlü siyasətini açıq şəkildə üzlərinə deməsi onları qıcıqlandırır. Məsələn, İrəvanda keçirilən Avropa Siyasi Birliyinin 8-ci Zirvə toplantısına videobağlantı ilə qoşulan Azərbaycan lideri Qərbin regionu yenidən müharibə və xaosa sürükləmək cəhdlərində aktiv iştirakını birbaşa üzlərinə bəyan etdi. Prezident İlham Əliyev məkandan, auditoriyadan və qarşısındakı güclərin miqyasından asılı olmayaraq, hər zaman yalnız və yalnız Azərbaycanın milli maraqlarını müdafiə edir, riyakar ssenariləri elə yerindəcə və sərt şəkildə darmadağın edir. Bu qətiyyət Ermənistana və onun xarici himayədarlarına aşkar bir mesajdır: Cənubi Qafqazda kənar diktə ilə deyil, yalnız Azərbaycanın şərtləri və bölgə dövlətlərinin maraqları ilə sülh mümkündür.

Ermənistanın qapamalı olduğu səhifələr

Azərbaycanın isə Ermənistanda hakimiyyətə gələcək qüvvələrdən öz gözləntiləri var. Bunlardan birincisi sülhün gələcəyini təminat altına almaq üçün Ermənistan Konstitusiyasından Azərbaycana qarşı ərazi iddialarının çıxarılmasıdır ki, Paşinyan da artıq seçkilərdən sonra bu dəyişikliyə gedəcəyinin anonsunu verib. Digər bir məsələ isə Qarabağ kartının əbədi olaraq ortadan qaldırılması, yəni Ermənistanda fəaliyyət göstərən qondarma Qarabağ institutunun bütün qalıqlarının hüquqi olaraq ləğv edilməsi ilə bağlıdır. Çünki separatizmin siyasi tör-töküntülərini qoruyub saxlamaq sülh gündəmi ilə heç bir halda uzlaşmır. Həm də bu təmizləmə əməliyyatı Ermənistan sərhədlərini də aşaraq digər ölkələrə də sirayət etməlidir. Rəsmi İrəvan öz diplomatik kanalları vasitəsilə beynəlxalq birliyə bəyan etməlidir ki, bu qondarma qurumların Ermənistan dövləti ilə heç bir hüquqi və siyasi bağı yoxdur və onların fəaliyyəti qanunsuzdur. Əgər İrəvan xaricdəki bu revanşist yuvaların qapadılması üçün addım atmırsa, deməli, gələcəkdə Azərbaycana qarşı istifadə etmək üçün bu kartı ehtiyatda saxlayır. Bakı isə bu yarımçıq ssenarilərə əsla imkan verməyəcək. Cənubi Qafqazda real sülhün bərqərar olması üçün separatizmin həm Ermənistandakı, həm də onun xaricindəki uzantıları tamamilə kökündən qazınmalıdır.

Hələlik isə Ermənistan cəmiyyəti "sülh, yoxsa savaş" seçimi qarşısındadır. Ermənistan tarixinin ən kritik dövrünü yaşayır və bu dövrdən necə çıxacağı onun öz seçimindən asılıdır.(Report)

]]> true https://azerinews.az/gundem/13673-mehriban-liyeva-avropa-empionu-olan-minifutbol-zr-azrbaycan-millisini-tbrik-edib.html rus Gündəm / Cəmiyyət Fri, 05 Jun 2026 16:39:22 +0400

Mehriban Əliyeva Avropa çempionu olan minifutbol üzrə Azərbaycan millisini təbrik edib

Azərbaycanın Birinci vitse-prezidenti Mehriban Əliyeva Avropa çempionu olan minifutbol üzrə Azərbaycan millisini təbrik edib.

Bununla bağlı birinci xanımın sosial şəbəkə hesablarında paylaşım edilib.

"Avropa çempionatının qalibi olan Azərbaycan minifutbol yığmasını təbrik edir, milli yığmamızın bütün üzvlərinə möhkəm cansağlığı, güc, enerji və yeni-yeni qələbələr və nailiyyətlər arzulayıram!", - paylaşımda qeyd olunub.

]]> true https://azerinews.az/gundem/13672-bakda-tdt-mrkzi-banklarnn-urasnn-toplants-olub-tdbir-ev-sahibliyi-trkiyy-trlb.html rus Gündəm / Cəmiyyət Fri, 05 Jun 2026 16:14:30 +0400

Bakıda TDT mərkəzi banklarının Şurasının toplantısı olub, tədbirə ev sahibliyi Türkiyəyə ötürülüb

Azərbaycan Mərkəzi Bankının (AMB) yeni inzibati binasında "Türk Dövlətləri Təşkilatına (TDT) üzv ölkələrin mərkəzi (milli) banklarının Şurası"nın II toplantısı keçirilib.

Tədbirdə TDT-nin baş katibi Kubanıçbek Ömüralıyev, Qazaxıstan Milli Bankının nümayəndə heyəti, Qırğızıstan, Özbəkistan və Türkiyə mərkəzi banklarının, həmçinin müşahidəçi qismində Macarıstan və Şimali Kiprin mərkəzi banklarının sədrləri toplantıda iştirak edib.

Açılış nitqi ilə çıxış edən AMB-nin sədri Taleh Kazımov Şuranın ölkələr və qurumlar arasında əməkdaşlıq üçün yeni imkanlar açdığını bildirib. O, qeyd edib ki, qlobal və regional iqtisadiyyatda qeyri-müəyyənliklərin artdığı, maliyyə bazarlarında indekslərin dəyişkənliyinin yüksəldiyi və rəqəmsal texnologiyalarının tətbiqinin genişləndiyi bir dövrdə Şura həm ortaq, həm də ölkəyə xas çağırışların həlli üçün mühüm platformadır. O, Şuranın pul siyasəti, maliyyə sabitliyi və maliyyə sektorunun inkişafı sahələrində daha sıx iqtisadi və maliyyə əməkdaşlığını təşviq etdiyini vurğulayıb.

K.Ömüralıyev isə Şuranın son iki ildə fəaliyyətindən, həm üzv ölkələr arasında, həm də regional əməkdaşlığın təşviqi istiqamətindəki rolundan danışıb.

Daha sonra "Mərkəzi bankların ortamüddətli dövrdə qlobal və regional risklərə qarşı monetar və maliyyə siyasəti tədbirləri" mövzusuna həsr olunan ilk sessiya başlayıb. AMB-nin baş direktoru Vüqar Əhmədov təqdimatla çıxış edərək qlobal iqtisadiyyatda və maliyyə sektorlarında baş verənlər nəzərə alınmaqla həyata keçirilən pul siyasəti və maliyyə sabitliyi siyasətləri, həmçinin onların nəticələri üzrə ölkə təcrübəsini bölüşüb. Təqdimatın yekununda sual-cavab sessiyası baş tutub, daha sonra nümayəndə heyətlərinin mövzu üzrə çıxışları dinlənilib.

Toplantının ikinci sessiyasında "Maliyyə texnologiyaları daxil olmaqla rəqəmsal maliyyə ekosistemlərinin inkişafı" mövzusu müzakirə olunub. AMB-nin Maliyyə texnologiyaları və innovasiyalar departamentinin direktoru Fidan Tofidi rəqəmsal maliyyə ekosisteminin inkişafı üzrə həyata keçirilən təşəbbüslər və görüləcək işləri üzrə ölkə təcrübəsi barədə təqdimatla çıxış edib. Sual-cavab sessiyasından sonra nümayəndə heyətlərinin mövzu üzrə çıxışları dinlənilib.

Çıxışlar zamanı iştirakçılar Şuranın regional və qlobal əhəmiyyətli platforma kimi fəaliyyətinin daha da genişləndirilməsi, həmçinin mərkəzi banklar arasında səmərəli qarşılıqlı əlaqələrin daha da gücləndirilməsinin önəmini vurğulayıb.

Toplantının rəsmi hissəsinin yekununda əldə olunan razılaşmaları və gələcək əməkdaşlıq sahələrini əks etdirən "Kommunike" imzalanıb. Şuranın sayca III toplantısının 2027-ci ildə Türkiyədə keçiriləcəyi elan olunub.

]]> true https://azerinews.az/gundem/13671-su-tsrrfat-v-meliorasiya-iilri-tltif-edilib-srncam.html rus Gündəm / Cəmiyyət Fri, 05 Jun 2026 15:48:56 +0400

Su təsərrüfatı və meliorasiya işçiləri təltif edilib - SƏRƏNCAM

Prezident İlham Əliyev su təsərrüfatı və meliorasiya işçilərinin təltif edilməsi haqqında sərəncam imzalayıb.

Su təsərrüfatı və meliorasiya sahəsində səmərəli fəaliyyətinə görə aşağıdakı şəxslər təltif ediliblər:

2-ci dərəcəli "Əmək" ordeni ilə

Quliyev Zakir Bəybala oğlu

Məmmədov Etibar Kərim oğlu

3-cü dərəcəli "Əmək" ordeni ilə

Bəşirov Yaşar Miskin oğlu

Əliyev Siyah Əli oğlu

Fərzəliyev Mehrəli Məmməd oğlu

Qafarlı Adil Rzaquli oğlu

Nəsirov Əlizadə Vahid oğlu

Seyidov Mirkamil Miriş oğlu

"Tərəqqi" medalı ilə

Allahverdiyev Hüseyn Məmməd oğlu

Aşumova Nərminə Nazim qızı

Əhədi Yusif Məmmədağa oğlu

Əliyev Səxavət Qədimalı oğlu

Əliyev Taleh Həbulla oğlu

Həmidov Akif Dəyyam oğlu

Xanverdiyev İntiqam Yunus oğlu

Qasımov Zahid Süleyman oğlu

Qoçəliyev Vüsal Aslan oğlu

Paşayev Mehdi Paşa oğlu

Səfərov Emil Qanbay oğlu

Səmədov Vasif Abid oğlu

Vəliyev Yaşar Həsən oğlu

"Dövlət qulluğunda fərqlənməyə görə" medalı ilə

Rüstəmov Oktay Musa oğlu.

]]> true https://azerinews.az/gundem/13670-rusiya-xin-azrbaycanl-dnizilrin-hlak-olmas-il-laqdar-basal-verib.html rus Gündəm / Cəmiyyət Fri, 05 Jun 2026 15:18:51 +0400

Rusiya XİN azərbaycanlı dənizçilərin həlak olması ilə əlaqədar başsağlığı verib

Rusiya xarici işlər nazirinin müavini Mixail Qaluzin Peterburq Beynəlxalq İqtisadi Forumu çərçivəsində azərbaycanlı dənizçilərin həlak olması ilə əlaqədar başsağlığı verib.

Bu barədə "News.ru" məlumat yayıb.

"Həlak olmuş Azərbaycan dənizçilərinin doğmalarına və yaxınlarına səmimi başsağlığımı bildirmək istərdim. Ölüm həmişə faciə, kədərdir", - Qaluzin bildirib.

Xatırladaq ki, Azərbaycan Xarici İşlər Nazirliyinin (XİN) məlumatına görə, Azov dənizinin Taqanroq körfəzində iki xarici yük gəmisinə pilotsuz uçuş aparatları ilə hücum nəticəsində ölkənin beş vətəndaşı həlak olub, üç nəfər isə yaralanıb.

]]> true https://azerinews.az/gundem/13669-ilham-liyev-azrbaycan-ekoloji-problemlrl-bal-hdliy-tam-msuliyytl-yanar.html rus Gündəm / Siyasət Fri, 05 Jun 2026 14:35:14 +0400

İlham Əliyev: Azərbaycan ekoloji problemlərlə bağlı öhdəliyə tam məsuliyyətlə yanaşır

Planetin üzləşdiyi ekoloji problemlər təkcə ekosistemlərə deyil, həm də dayanıqlı inkişafa, insan sağlamlığına, həyat şəraitinə və ölkələrin tərəqqisinə ciddi təsir göstərir.

Bu barədə Azərbaycan Prezidenti İlham Əliyevin 2026-cı il Ümumdünya Ətraf Mühit Günü ilə bağlı müraciətində deyilir.

Dövlət başçısı qeyd edib ki, gələcək nəsillərin rifahı bu günkü nəslin bu çağırışların öhdəsindən gəlmək bacarığından asılıdır:

"Biz Azərbaycanda bu öhdəliyə tam məsuliyyətlə yanaşır və ətraf mühitin mühafizəsi sahəsində genişmiqyaslı layihələr həyata keçiririk".

]]> true https://azerinews.az/cemiyyet/13668-nb-gn-bakda-30-drc-isti-olacaq.html rus Cəmiyyət / Gündəm Fri, 05 Jun 2026 12:58:12 +0400

Şənbə günü Bakıda 30 dərəcə isti olacaq

Bakıda və Abşeron yarımadasında iyunun 6-da hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir.

Milli Hidrometeorologiya Xidmətindən verilən məlumata görə, şimal-qərb küləyi gündüz cənub-şərq küləyi ilə əvəz olunacaq.

Havanın temperaturu gecə 16-19° isti, gündüz 25-30° isti olacaq. Atmosfer təzyiqi 761 mm civə sütunu, nisbi rütubət gecə 60-65 %, gündüz 45-55 % olacaq.

Azərbaycanın rayonlarında havanın əsasən yağmursuz keçəcəyi, lakin gündüz dağlıq və dağətəyi rayonlardan başlayaraq bəzi yerlərdə arabir yağıntılı olacağı gözlənilir. Ayrı-ayrı yerlərdə qısa müddətə intensivləşəcəyi, şimşək çaxacağı, dolu düşəcəyi ehtimalı var. Gecə və səhər bəzi yerlərdə duman olacaq. Mülayim şərq küləyi əsəcək.

Havanın temperaturu gecə 15-18° isti, gündüz 26-31° isti, dağlarda gecə 5-10° isti, gündüz 13-18°, bəzi yerlərdə 21-26° isti olacaq.

]]> true https://azerinews.az/gundem/13667-murat-kurum-trkiy-cop31-d-bak-hdfi-bada-olmaqla-hdliklrin-icrasn-prioritet-hesab-edir.html rus Gündəm / Cəmiyyət Fri, 05 Jun 2026 12:29:18 +0400

Murat Kurum: Türkiyə COP31-də Bakı hədəfi başda olmaqla öhdəliklərin icrasını prioritet hesab edir

Türkiyə COP31-də Bakı hədəfi başda olmaqla öhdəliklərin icrasını prioritet hesab edir.

Bunu Türkiyənin ətraf mühit, şəhərsalma və iqlim dəyişikliyi naziri, COP31-in prezidenti Murat Kurum BMT-nin Ətraf Mühit Proqramı (UNEP) ilə tərəfdaşlıq çərçivəsində Azərbaycanın ev sahibliyi etdiyi 5 iyun – Ümumdünya Ətraf Mühit Gününə həsr olunan tədbirə videomüraciətində deyib.

Onun sözlərinə görə, COP31 yalnız yeni öhdəliklərin müzakirə edildiyi bir zirvə olmayacaq:

"Türkiyə COP31-ə evsahibliyi edərək Bakı hədəfi başda olmaqla COP29-da ortaya qoyulan öhdəliklərin icrasını diqqətlə izləyir. Çünki çoxtərəflilik dediyimiz etibarlılıq yalnız hədəflər müəyyən etməklə deyil, verilən vədlərin yerinə yetirilməsi, qərarların praktikada tətbiq və s. ilə təmin olunur. COP31 əməkdaşlığın və konkret nəticələrin ön plana çıxarıldığı bir COP olacaq. Çünki dünya artıq sadəcə yeni vədlər eşitmək istəmir. Dünya verilən vədlərin həyata keçirildiyini görmək istəyir".

]]> true https://azerinews.az/gundem/13666-iyunun-15-d-super-tz-ay-hadissi-olacaq.html rus Gündəm / Cəmiyyət Fri, 05 Jun 2026 11:22:06 +0400

İyunun 15-də Super Təzə Ay hadisəsi olacaq

İyunun 15-də Super Təzə Ay (Super New Moon) müşahidə olunacaq.

Bu barədə Bakı Dövlət Universitetinin Fizika fakültəsinin Astrofizika kafedrasından məlumat verilib.

Bildirilib ki, bu hadisə Ayın həm Təzə Ay fazasında olması, həm də Yerə minimum məsafəyə – perigey nöqtəsinə çox yaxın yerləşməsi ilə xarakterizə olunur.

Ay iyunun 15-i Bakı vaxtı ilə saat 03:19-da perigey nöqtəsindən keçəcək, bu zaman onun Yerə qədər məsafəsi 357 195 km olacaq. Cəmi bir neçə saat sonra, saat 06:56-da Ay Təzə Ay fazasına daxil olacaq. Perigey ilə Təzə Ay arasındakı zaman fərqi təxminən 3 saat 37 dəqiqə təşkil etdiyindən, bu hadisə astronomiyada Super Təzə Ay adlandırılır.

Qeyd edək ki, indiyədək qeydə alınan ən yaxın Super Təzə Ay hadisələrindən biri 22 yanvar 2023-cü ildə baş verib. Bu zaman Ay Yerə təxminən 356 568 km məsafəyə qədər yaxınlaşıb.

]]>