İdman - Azeri News

Prezidentin sosial şəbəkə hesablarında Azərbaycan minifutbol millisi ilə bağlı paylaşım edilib

rus — Fri, 05 Jun 2026 10:17:03 +0400

Prezident İlham Əliyev minifutbol üzrə Avropa çempionatının qalibi olan Azərbaycan milli komandasını təbik edib.

Bununla bağlı dövlət başçısının sosial şəbəkə hesablarında paylaşım edilib.

"2022-ci ildə Avropa çempionu, 2025-ci ildə dünya çempionu olmuş Azərbaycan minifutbol millisi ölkəmizin idman tarixinə daha bir parlaq səhifə yazaraq növbəti dəfə Avropa çempionu oldu. Bu qələbənin komanda idman növündə qazanılması ikiqat sevindiricidir.

Komandamızı bu möhtəşəm qələbə münasibətilə səmimi-qəlbdən təbrik edir, millimizə yeni-yeni uğurlar arzulayıram", - paylaşımda qeyd olunub.

Avropa Minifutbol Federasiyası sosial şəbəkədə Azərbaycan millisi ilə bağlı paylaşımlar edib

rus — Fri, 05 Jun 2026 08:53:03 +0400

Avropa Minifutbol Federasiyasının feysbuk sosial şəbəkəsi hesabında Slovakiyada keçirilən qitə çempionatının qalibi olmuş Azərbaycan millisi ilə bağlı paylaşımlar edilib.

Paylaşımda Azərbaycan millisinin üzvləri 2026-cı ilin Avropa çempionları adlandırılıb.

Federasiyanın sosial şəbəkə hesabında həmçinin Azərbaycan millisi üzvlərinin qələbə sevincini əks etdirən video da paylaşılıb.

Qeyd edək ki, Elşad Quliyevin baş məşqçisi olduğu minifutbol üzrə Azərbaycan millisi "Tipos Arena"da keçirilən final matçında Ukrayna yığmasını 2:0 hesabı ilə məğlub edib.

Avropa çempionatı: Azərbaycanın minifutbol millisi bu gün finalda Ukrayna ilə qarşılaşacaq

rus — Thu, 04 Jun 2026 09:43:27 +0400

Minifutbol üzrə Azərbaycan millisi Slovakiyada keçirilən Avropa çempionatında final oyununa bu gün çıxacaq.

Elşad Quliyevin baş məşqçisi olduğu kollektiv həlledici matçda Ukrayna ilə üz-üzə gələcək.

Qarşılaşma "Tipos Arena"da, Bakı vaxtı ilə saat 22:30-da start götürəcək.

Xatırladaq ki, Azərbaycan millisi ötən gün əsas vaxtı 1:1 hesabı ilə bitən yarımfinal görüşünün penaltilər seriyasında Serbiya seçməsini üstələyib - 3:1. F qrupunda Avstriya (1:0), İtaliya (3:0) və Fransanı (3:2) məğlub edən komanda 1/8 finalda Qazaxıstanı (3:2), 1/4 finalda isə Çexiyanı (5:2) məğlub edib.(Report)

DÇ-2026-nın ən yaşlı və ən gənc iştirakçıları müəyyənləşib

rus — Wed, 03 Jun 2026 14:51:08 +0400

Futbol üzrə dünya çempionatında çıxış edəcək ən yaşlı və ən gənc futbolçular müəyyənləşib.

Portuqaliya yığmasının hücumçusu Kriştianu Ronaldu mundialda iştirak edəcək ən yaşlı futbolçulardan biridir.

O, turnirin startında 41 yaş 126 günlük olacaq. Ronaldu oynayacağı təqdirdə, misirli Essam Əl-Hədəri (45 yaş), kolumbiyalı Fərid Mondraqon (43 yaş), kamerunlu Roje Milladan (42 yaşlı) sonra turnir tarixində bir matçda meydana çıxan 4-cü ən yaşlı futbolçu olacaq.

DÇ-2026-da ən yaşlı oyunçuların siyahısında Ronaldunu Meksika millisinin qapıçısı Qilyermo Oçoa (40), xorvatiyalı yarımmüdafiəçi Luka Modriç (40), Bosniya və Herseqovinanın hücumçusu Edin Ceko (40), almaniyalı Manuel Noyer (40) və Kabo-Verde yığmasının qapıçısı Vozinya (39) izləyir.

Yarışın ən gənc futbolçusu isə Meksika yığmasının 17 yaşlı üzvü Xilberto Moradır. "Tixuana" klubunun üzvü şans qazanacağı təqdirdə, turnir tarixinin KONKAKAF-ı (Şimali Amerika, Mərkəzi Amerika və Karib Hövzəsi Konfederasiyası) təmsil edən ən gənc oyunçusu olacaq və 1930-cu ildə Uruqvayda təşkil edilən mundialda 18 yaşında olan həmvətəni Manuel Rosasın rekordunu təzələyəcək.

X.Mora Meksika yığmasının Cənubi Afrika Respublikasına qarşı keçirəcəyi açılış matçında oynayarsa, Pele (Braziliya), Salomon Olembe, Samuel Etoo (hər ikisi Kamerun), Femi Opabunmi (Nigeriya) və Norman Uaytsayddan (Şimali İrlandiya) sonra turnirin tarixinə düşən 6-cı ən gənc futbolçu adını qazanacaq.

DÇ-2026-da oynayancaq gənc futbolçuların ilk "5-liy"ində həmçinin Çexiya millisinin yarımmüdafiəçisi Huqo Soçurek (18 yaş 4 gün), Almaniya təmsilçisi Lennart Karl (18 yaş 109 gün), Seneqalın hücumçusu İbrahim Mbaye (18 yaş 138 gün) və misirli futbolçu Həmzə Əbdülkərim (18 yaş 161 gün) də qərarlaşıb.

Qeyd edək ki, iyunun 11-dən iyulun 19-dək ABŞ, Kanada və Meksikada keçiriləcək DÇ-2026-ya 48 komanda qatılacaq.

UEFA Çempionlar Liqasında iştirak edəcək bütün komandalar məlum olub

rus — Wed, 03 Jun 2026 11:08:31 +0400

UEFA Çempionlar Liqasının 2026/2027 mövsümündə iştirak edəcək komandalar müəyyənləşib.

Apasport.az xəbər verir ki, turnirdə ümumilikdə 81 klub mübarizə aparacaq.

Onlardan 36-sı əsas mərhələdə çıxış edəcək. Bu komandalardan 29-u artıq bəllidir. Daha 7 klub isə təsnifat mərhələlərinin yekununda müəyyənləşəcək. Həmin komandalardan 5-i çempionlar yolundan, 2-si isə liqa yolundan əsas mərhələyə vəsiqə qazanacaq.

Əsas mərhələdə İngiltərədən “Arsenal”, “Mançester Siti”, “Mançester Yunayted”, “Aston Villa” və “Liverpul” iştirak edəcək. İtaliyanı “İnter”, “Napoli”, “Roma” və “Komo”, İspaniyanı isə “Barselona”, “Real Madrid”, “Vilyarreal”, “Atletiko” və “Betis” təmsil edəcək.

Almaniyadan “Bavariya”, Dortmund “Borussiya”sı, “Leyptsiq” və “Ştutqart”, Fransadan PSJ, “Lans” və “Lill” əsas mərhələdə yer alacaq. Bundan başqa, PSV, “Feyenoord”, “Portu”, “Sportinq”, “Brügge”, “Slaviya”, “Qalatasaray” və “Şaxtyor” da birbaşa əsas mərhələdə çıxış edəcək. Türkiyənin digər təmsilçisi “Fənərbaxça” isə Çempionlar Liqasında mübarizəyə II təsnifat mərhələsindən başlayacaq.

Ölkəmizi isə qitənin ən nüfuzlu futbol turnirində “Sabah” təmsil edəcək. Komandamız mübarizəyə I təsnifat mərhələsindən başlayacaq. “Sabah” çempionlar yolunda yer alıb.

Təsnifat mərhələlərinin oyunları 7-8 iyulda start götürəcək. Əsas mərhələ isə sentyabrın 8-10-da başlayacaq.

Final oyunu 2027-ci il iyunun 5-də Madriddə keçiriləcək.

Azərbaycanın minifutbol millisi Avropa çempionatının 1/4 finalında bu gün Çexiya ilə qarşılaşacaq

rus — Tue, 02 Jun 2026 09:11:47 +0400

Azərbaycanın minifutbol millisi Slovakiyada keçirilən Avropa çempionatında 1/4 final oyununa bu axşam çıxacaq.

Elşad Quliyevin baş məşqçisi olduğu kollektiv Çexiya ilə üz-üzə gələcək.

Qarşılaşma "Tipos Arena"da, Bakı vaxtı ilə saat 00:00-da start götürəcək. Cütün qalibi yarımfinalda Rumıniya - Serbiya duelinin güclüsü ilə görüşəcək.

1/4 finalda həmçinin Macarıstan - Bolqarıstan və Gürcüstan - Ukrayna oyunları baş tutacaq.

Xatırladaq ki, Azərbaycan millisi 1/8 finalda Qazaxıstan yığmasından güclü olub - 3:2. Komanda F qrupunda Avstriya (1:0), İtaliya (3:0) və Fransanı (3:2) məğlub edib.

Minifutbol üzrə Avropa çempionatı: Azərbaycan millisi bu gün Qazaxıstanla qarşılaşacaq

rus — Mon, 01 Jun 2026 09:59:09 +0400

Minifutbol üzrə Azərbaycan millisi Slovakiyada keçirilən Avropa çempionatında növbəti oyununa bu axşam çıxacaq.

Elşad Quliyevin baş məşqçisi olduğu kollektiv 1/8 finalda Qazaxıstan ilə üz-üzə gələcək.

Matç "Tipos Arena"da, Bakı vaxtı ilə saat 00:00-da start götürəcək.

Bu gün həmçinin 1/8 finalda Rumıniya - Avstriya, Yunanıstan - Serbiya, Çexiya - Monteneqro görüşləri baş tutacaq.

Azərbaycan - Qazaxıstan cütünün qalibi 1/4 finalda Çexiya - Monteneqro duelinin güclüsü ilə münasibətlərə aydınlıq gətirəcək.

Xatırladaq ki, 1/8 finalın digər 4 oyunu dünən baş tutub:

Bosniya və Herseqovina - Macarıstan 2:2 (p. - 2:3)

Bolqarıstan - Fransa 6:1

Polşa - Gürcüstan 1:1 (p. - 2:3)

Ukrayna - Portuqaliya 3:1

Avropa çempionatı iyunun 4-də başa çatacaq. Azərbaycan millisi daha əvvəl Avstriya (1:0), İtaliya (3:2) və Fransanı (3:2) məğlub edərək F qrupunun lideri olub.

Bakıda keçiriləcək akrobatika gimnastikası üzrə Dünya Kubokunda 11 ölkə iştirak edəcək

rus — Wed, 27 May 2026 15:08:18 +0400

Bakıda keçiriləcək akrobatika gimnastikası üzrə Dünya Kubokunda 11 ölkə iştirak edəcək.

Bu barədə Azərbaycan Gimnastika Federasiyasının rəsmi saytı məlumat yayıb.

Yarışda Azərbaycan idmançıları ilə yanaşı Avstraliya, Belarus, Bolqarıstan, Estoniya, Gürcüstan, Qazaxıstan, Polşa, Rusiya, İspaniya və Ukrayna təmsilçiləri də mübarizə aparacaq.

Xatırladaq ki, Dünya Kuboku iyunun 5-7-si aralığında Milli Gimnastika Arenasında təşkil olunacaq.

Azərbaycan Premyer Liqasında bu gün iki oyun keçiriləcək

rus — Fri, 15 May 2026 09:23:12 +0400

Misli Premyer Liqasında XXXII tura bu gün start veriləcək.

İlk oyun günündə iki görüş baş tutacaq.

Əvvəlcə "Karvan-Yevlax" "Qəbələ"ni qəbul edəcək. Yevlax şəhər stadionunda, saat 17:00-da başlayacaq matçı Əli Əliyev idarə edəcək. Yevlax təmsilçisi hazırda 14 xalla turnir cədvəlinin sonuncu - 12-ci pilləsində qərarlaşıb. 21 xala malik "Qəbələ" isə 11-cidir.

Günün son matçında "Araz-Naxçıvan" "Kəpəz"lə üz-üzə gələcək. "SOCAR Polymer Arena"da, saat 19:30-da start götürəcək görüşü Rəşad Əhmədov idarə edəcək. "Araz-Naxçıvan" 40 xalla 7-ci yerdədir. 27 xala malik Gəncə klubu isə 10-cudur.

Qeyd edək ki, tura mayın 17-də yekun vurulacaq.

"Bakı–Xankəndi" Azərbaycan velosiped yarışının üçüncü mərhələsi bu gün başlayır

rus — Tue, 12 May 2026 09:28:12 +0400

"Bakı–Xankəndi" Azərbaycan velosiped yarışının üçüncü mərhələsi bu gün başlayır.

Üçüncü mərhələ 162,9 kilometr məsafəni əhatə edəcək.

Qəbələdə start götürəcək tur Mingəçevirdə yekunlaşacaq.

İlk mərhələdə finişə Çinin "Li-Ninq Star" komandasının belaruslu üzvü Aleksey Şnirko birinci çatıb. Ötən gün "Astana"nın qazaxıstanlı velosipedçisi Yevgeni Fyodorov növbəti raundun qalibi olub.

Beynəlxalq Velosipedçilər İttifaqının (UCI) 2.1 kateqoriyalı yarışında dünyanın 20 ölkəsini təmsil edən 24 komanda mübarizə aparır. Beş mərhələdən ibarət olan yarışın mükafat fondu 50 000 avrodan çoxdur. Yarışa mayın 14-də yekun vurulacaq.

Turnirin son mərhələsi isə Xankəndi şəhərində baş tutacaq.